راكــــــــــــــــان

أول شي بسم الله الرحمن الرحيم ..

هذا واجب ممر لي من قبل المدونة حياة عالية ومرر لي بعد من قبل المدونة مضيعة بيتهم .. على العموم

 هو واجب نشر غسيل ..  المشكلة ماعندي معلاق

ههههههههههههههههههه

 . (( رحم الله امراء عرف قدر نفسه )) يعني أنا بين قوسين عجاااز .. مافيه أمل اتحرك ….ههههههه

والنوم هو مشكلتي الأزلية بعد اذا نمت ماقمت . واذا قمت مانمت ….

وعندي مشكلة عدم الجرأة يعني أخاف أقابل مسؤؤل كبير مثلا  … مب عدم جرأة يعني خوف من شي ..

لكن ما أحب يعني أكون مقابل للجمهور .. يعني أقابل ناس واجد باليوم ..

أنا أقول نكتفي هنا .. لانه الواحد مايحكم على نفسه … بس العيب مب في فعل العيب نفسه العيب في

الاستمرار .يعني أنا بالعكس أقول الواجب هذا حلو .. يخليك تفكر . وتقول بنفسك وش عيوبك ..

وتحاول ترتقي بشخصيتك للأفضل .. مثلا إنسان عصبي بطبعه ,, وهو عرف أنه عصبي هل يقول خلاص

أنا عصبي ويترك كل شي ويستمر على حاله ..

لا طبعا .. يعني دايم حاول تخفف من عيوبك .. وتحاول ترتقي بشخصيتك .,,,

ودمتم .

بسم الله الرحمن الرحيم ..

السلام عليكم ورحمة الله وبركاتة .. أعتذر على الــتأخير في إنزال هذا البوست .. لكن وش نسوي .. تعرفون الدراسة …

على العموم ,,,  لكي تتأكد من صحة كلامي أطلع بالسيارة ولف لك لفتين على حارتكم وتعال اقراء البوست

يعني شف الكتابات على الجدران .. ماتلاحظون أن اللي يكتبون يرسمون بفن . يعني والله أني اشوف رسمات . لو أرسمها بالقلم ماقدرت ارسمها .

كيف هذولا يقدرون يرسمونها .لا وبخاخ بعد يعني مب قلم .. والله أنهم فنانين المفروض يستغلون هذه المواهب . في الفن ولا شي … والله عندنا مواهب مدفونة في البلد ولا أحد قادر يكتشفها ..

يعني لو يحطون جدار كبير ويسمحون الشخبطة فيه .. وتكون عليه رقابة . (( يعني محد يكتب عليه شي مخل بالآداب  )) ..

يعني بالله قارونا بين هالجدارين :

شوفوا الفن وشلون . صدقوني شبابنا عندهم مواهب أكثر من كذا . لكن ماعرفوا يطلعونها صح . وبالأحرى مالهم طريقة يعبرون فيها .

لكن الحين شوفوا الصورة الثانية :

شفتوا الفرق كيف . :) 

في نهاية البوست … فيه مشكلة عندي بالمدونة أنه فيه تعليقات ماتطلع على المدونة ويعتبرها مزعجة ويحطها مع التعليقات المزعجة مع أنها مب مزعجة مدري هو على كيفه الباشا يقرر هي مزعجة ولا لا .. أتمنى اللي عنده حل للتعليقات المزعجة يعلمني ..

ودمتم .

بسم الله الرحمن الرحيـــمــ !!

 كيف الحال أخباركم يالمدونين والمدونات ؟؟؟  ( بالبوست هذا جاي أحل واجب ممر لي من الأخت مضيعة بيتهم ))

_ والله أنا بالنسبة لي أنا أسمع أمي دايم تقولي صوتك مزعج قصر صوتك يمكن أنا صوتي يسبب إزعاج للناس :(! لكن الأشياء اللي تزعجني صوت

 التحفير اذا كان في واحد جنب بيتكم يعمر ولا يرمم ولا أي شي .

_ والله أصوات ناس يسولفون جنبي وأنا نايم هذه أكثر شي تقهر بالنسبة لي . دايما أنقهر منها

_ وفيه صوت الفلين اللي يصرصر ولا صوت صكصة الأسنان وفيه بعد صوت الطبشور على السبورة بس الحمد لله سبابير مدرستنا أقلام > هع

والله هذه هي باختصار الأصوات اللي تزعجني واذا كان فيه صوت زيادة فهو سقط سهوا .

بسم الله الرحمن الرحيم

إلى متى أيها المسلمون رسولكم يهان ويشتم وأنتم تسكتون ؟؟

يا اخوان… ماذا ستكون ردة فعل أحدكم لو قام شخص بسب و شتم أحد من أقاربك

 كأمك أو أختك أو أبوك ؟؟ طبعا ردة الفعل ستكون قاسية…

فما بالكم في من شتم رسولنا الكريم الذي هو أحب من أمهاتنا وآبائنا إلينا؟

((اللهم لا تشمت بنا الاعداء والحساد وأرهم ضعفهم وأنصرنا عليهم يا رحمن يا رحيم))

((اللهم أني أسألك أن ترد كيدهم في نحرهم وأن تجعل تدبيرهم تدميرهم ))

هلابالمدونات أخبار علوم تاريخ >>> لاتنكت واجد يابو !!

المهم بعطيكم حادثة تخوف صارت لي انا وأخوياي

الاول : مسطول مدمن فول

الثاني : رياض الملحوس

كنا طالعين للبر وحاطين الشاهي على الدافور وفصفص وأنواع الزحفان >هع .

المهم جاء رياض الملحوس قال وش رايكم نروح نتمشى نمغط رجلييننا

أنا : قدام

مسطول مدمن فول : مشينا.

أنا ومسطول مدمن فول مشينا قبل رياض الملحوس المهم حنا مشينا ورياض الملحوس كان ورانا. مدري الا اسمع صوت رياض الملحوس يقول داب داب (( ثعبان ثعبان )) >> لغير الناطقين باللغة القصمنجية

المهم انا التفت يساري بكل برود الا والله أناظر داب أم جنيب تكرفش عن يساري وأول ماشفتها العطة

فركت فركة مب صاحية هههههههههههه ومسطول مدمن فول أول ماقال لنا رياض الملحوس ماصدق لكن يوم شافني عطيت قال ياولد شكلها صدقية .

المهم كلنا أبعدنا عن الداب ونراقبها من بعيد >> أنواع الخوف.

نناظرها شوي الا الأخت تمشي وتدخل على فرشتنا وتزحف وتروح عند الدافور. وتنسدح هناك وتقعد . حنا قلنا انواع الورطة الحين وشلون بنمشي ونأخذ أغراضنا وهي قاعدة جنب الدافور .

أنا : وشلون بنمشي ياعيال الحين

رياض الملحوس : الحمد لله يارب أني شفتها ولا كان الحين قارصتك ياراكان الحمد لله يارب (( قاعد رياض يدعي ويقول أذاكر ومدري وش يقول بعد ))

مسطول مدمن فول : من جد وشلون بنمشي لازم نذبحها .

أنا : والله من جد يابو .

مسطول : لقيت فكرة ياعيال خلنا نرجمها بالفناجيل عشان تقرب من عند السيارة وندعسها

أنا : والله انك سنايدي يامسطول

 المهم والله وأمسك فنجال وأحلته الا والله مايجي عليها . ونحاول نرجم بعضها تجي بعضها لا

المهم الحمد لله وتبعد الداب وتجي تحت كفر السيارة بالضبط مسطول قال الحين وقتها يازكرت

ويروح مسطول يركب السيارة ويشغل ويدعس ام ام امها ورجع ماندري الا الثعبان مشى بسرعة ورجع عند الدافور لكن الثعبان مامات بس انجرح .

أنا : الحين رجعت وش نسوي

رياض (( الا الحين قاعد يدعي أنه شافها ))

مسطول : اقول مالنا الا نسوي نفس الحركة مرة ثانية

ونقعد نسوي نفس الحركة مرة ثانية والحمد لله راحت تحت كفر السيارة . مسطول شغل الموتر وداعسها أربع مرات .

ولا ماتت . حنا قلنا لا هذه ماتموت أبد .

بس الحمد لله أنها الحين صارت بالرمل وماتتحرك الا تحركات بسيطة .

مسطول : أم الفلة لقيت فكرة ياعيال

رياض : وشي

مسطول : خلنا نصب عليه شاهي حار

أنا : لا عز الله أنك ذيب يامسطول .

كان الشاهي حار لكن حطيناه على الدافور زيادة عشان تحترق الداب صدق هع .

المهم تعرفون ياشباب قارورة موية اأم ريال عبينها شاهي حار لدرجة ان القارورة بدت تذوب .

ونصب عليها أربع قوارير منه شاهي حااااار ولا تموت بنت الذين .

المهم حنا الحين بدينا نشك في الموضوع يمكن ماتت يمكن ماماتت .

أنا : اكيد أنه ماتت ياعيال

مسطول : والله مدري يمكن

رياض : لا ماتوقع انه ماتت بس مدري يمكن

أنا : اوووه ياعيال تراكم فليتوها لو أننا ضافين الأغراض وماشين كان قد دخلنا الديرة الحين

مسطول : لا يابو ترى سنة انك تذبحها

رياض : ايه مدري هي سنة ولا لا بس زين انك تقتله

أنا : مسطول يابو الافكار ماطلعت لنا فكرة جديدة

مسطول : هههههههههههههه أقول لايكثر يابو

رياض : هههههههههههههه من جد

أنا : رياض يابو وشلون قزيت الداب .

رياض : وش رايك بي عاد .

أنا : والله أنك وحش ياشيخ .

عاد معروفة من زمان رياض ماشاء الله عليه عنده قوة بصر ماشاء الله دايم يقز الاشياء مثل مايقولون قزيز .

كم مرة صارت مواقف يقز فيها الناس .

مسطول : اووه ياعيال لايكثر خلاص ياخي خلونا نذبح الداب

رياض : على ايدك نشوف.

مسطول : أقول ترى عندي زيت دركسونأنا : طيب بشر أمك

مسطول : مسوي تنكت في هالموقف الحرج

أنا : اهدى من كذا ياحرج انت هههههههههه

مسطول : وش رايكم نجيب حطبة ونحط عليها مناديل ونكب عليهن زيت فرامل ونولعها ونحرق الداب

رياض : يقطع أم الفكرة قدام

المهم سوينا الحركة وتقب الحطبة مرة وحدة بغينا نروح فيها بس الحمد لله

أجي انا مسوي روبن هود الله يهدين واحلت الحطبة بس ماجات على راس الداب جت قريبة منها

مسطول : هاه يافالح ياقناص ماشاء الله عليك على راس الداب

أنا : اقول خلنا نعيد الحركة ونظبطها صح

مسطول : يلا

ونعيد الحركة مرة ثانية وهالمرة كثرنا المناديل

ويجي مسطول البطل ويحلت الحطبة وتجي على راسها صح والداب تحترق وتنتهي آخر لحظات حياتها السعيدة.

المهم فيما كان رياض ومسطول وأنا منهمكين في قتال الداب الشرسة .

قدرت ألتقط لكم بعض الصور للثعبان الخطير اللي طلع لنا !!!!

اترككم مع الصور

1 :

ناظر الثعبان جنب الدافور ملتفة عليه

2:

هذه صورة من زاوية أخرى

3 :

وهذه الداب يوم دعسنها أربع مرات وكبينا عليها الشاهي شف كيف ماتبين بالرمل

أتمنى ماأكون طولت عليكم لكن في النهاية حبيت أعطيكم معلومات عن الثعبان اللي طلع لنا .

أول شي صورتة

الأسم العلمي: Cerates cerates

الأسم العربي: أم جنيب أو الأفعى المقرنة.

1- وصف الحيوان:

افعى قصيرة تعيش في المناطق الصحراوية جسمها غليض وقصير كما توجد زوائد جلدية على مقدمة الرأس تشبة القرون يبلغ طول الحيوان حوالي 800ملم كما أن طريقة السير لدى الحيوان جانبية وليس إلى الأمام ولذلك سميت بأم جنيب كما أن الحراشف لدى هذة الافعى خشنة .

2- درجة السمية.

هذا الحيوان ذو أنياب أمامية ولذلك يعتبر من الثعابين الخطيرة جدآ وسمة من النوع اللذي يهاجم الجهاز الدموي ويقوم بتدمير الخلايا الدموية.

3-بعض سلوكيات الحيوان.

هذه الافعى من الافاعي الصحراوية وهي بذلك تكون من الافاعي الليلية حتى تتجنب درجات الحراره العالية كما تتغذا على السحالي والجرابيع وفي بعض الأحيان تقوم الافعى بدفن نفسها بالتربة ويبقي جزء صغير من مقدمة الوجة خارج التربة حتى تتمكن من الصيد وتساعدها حراشفهاالخشنة في الغوص بالتربة وفي حال تعرض الافعى لأي خطر فهي تقوم بحك الحراشف ببعضها مصدرآ بذلك صوت قوي يشبه الخشخشة وذلك يساعدهاعلى طرد المعتدي.

آسف على الأطالة

وهذه إحدى المواقف اللي صارت لي وفي البوست الجاي بعطيكم ملخص الإجازة كلها!! لكن عشان السالفة هذه مهمة خليتها في بوست لحالها

يلا عاد كل واحد يقراء الموضوع يقول لي الحمد لله على السلامة

بسم الله الرحمن الرحيم !

نرجع لكم بعد الاختبارات (( ولله الحمد ههههه))

 ملخص أيام الاختبارات .

أول يوم : طبعا زي اول يوم لازم قلق وخوف نفسي من الاختبارات. اول يوم كان علي اختبار رياضيات وتوحيد . المهم الرياضيات كان سهل جدا لدرجة اني ندمت اني ذاكرت

لوووول . والتوحيد متوسط بس الحمد لله .

بعطيكم شي اعتيادي اسويه كل يوم . اول شي اروح أختبر اوقع واسلم الورقة واطلع من القاعة بعدين أروح كل يوم لماما نورة (( ماما نورة اسم مطعم في الرياض ))

أروح هناك وأفطر وأقعد شوي مع أخوياي بعدين ارجع للبيت أنام ساعتين بالظبط بعدين اصحى وأذاكر وكل يوم على هذا المشوار .

المهم بعطيكم سالفة صارت لي في أيام الاختبارات يوم كنت طالع من الاختبارات لحالي لان اخوياي كلهم مشغولين مدري وش عندهم المهم في الموضوع

اني قلت مدام اني لحالي بغير وبروح اتغدا في ماكدونالدز المهم أني دخلت ولقيت واحد من اخوياي قديم جدا يعني كنت منقطع عنه من تقريبا سنتين .

المهم انا يوم شفت شكله انهبلت لانه صار مع احترامي له خكري لآخر درجة شعره طويل وبنطلونه ضيق ومنزل بنطلونه تحت وماسك سيجارة لاحول ولا قوة الا بالله

والله تغير جدا . المهم أني رحت بسلم عليه لقيته يتصدد عن يوم شفت وضعه كذا قلت والله مااسلم عليه  خله هو يجي يسلم علي .

المهم انتهت الاختبارات ولله الحمد

يوم الاربعاء بعد الاختبارات  رحت للقصيم (( عنيزة )) .

وبخلص اجازتي هناك الاسبوع كامل

وراح اوافيكم بإذن الله بآخر الاحوال . وآخيرا اقدم اعتذاري الشديد على عدم ردودي على بعض المدونات بسبب انشغالي بالاختبارات

 الموضوع باين من عنوانه .

لن أقول وداعا عالم التدوين ولكن أقول الى اللقاء

نلتقي أحبتي بعد الإختبارات ودعواتكم لي بالتوفيق

البيبسي اهم شي عشان كذا حاطه بالنص ههههههههههه

ههههههههههههههههههههه عجبني السؤال والله .

 والله الهروب هو النوم أنا عندي صراحة دائما أركب المنبة  ولا أقوم الا بعد ساعة من التنبية يعني أسحب على المنبة ماأقوم هههههه

اللي يقومني جوالي دائما المكالمات اللي تجيني انا عادتي مااحط الجوال صامت اذا قيلت الظهرية ولا نمت الصبح ماحطه صامت الا بالليل .

المهم مشكورين على حل الواجب.

أتمنى أني اخذت درجة كاملة

ترى اذا ماأخذت درجة كاملة بنقل من مدرستكم >> هع

شاحذين اخر زمن !!!

 كتبت هالبوست بعد موقف عجيب صار معي .

 بعصرية من العصريات كنت رايح لمطعم ومكيف وفالها على الاخر المهم وادخل المطعم واخذ سفري وانا  طالع وتقابلني  حرمة عجوز مقبلة لي .

المهم انا قلت وش تبي ذي وأقعد احتريها جت قالت ياوليدي حنا اخوان ومن هالكلام المهم انها كانت شحاذه

 (PP ) قالت ابي حق التكسي انا فتحت البوك اشوف وضع الفلوس ومالقيت فيه فكه الا ريال واحد بس . المهم انا اعطيتها :D  قالت ريال

قلت ايه . قالت وش اسوي بريال .

جيت انا دخلته ببوكي وقلت لاتسوين به شي انا احتاجه اكثر منك

لاحول ولا قوة الا بالله .

يعني اتوقع لو كانت محتاجة صدق كان أخذت الريال لكن للاسف ماتوقع انها محتاجة لدرجة انها بطرانة على الريال

ولا وش رايكم انتم

اول شي السلام عليكم

اليوم رحت بجدد اشتراك للاي ار تي الله يقلعهم .:@

المهم انا رايح والكرت معي على اساس الاسعار نفسها لاني كنت ضروري اجدد لان فيه مباريات قريبة والاشتراك بيخلص بعد اربع ايام .

المهم اني رحت لفرعهم اللي بطريق الملك فهد بعد مكتبة العبيكان >> قاعد اوصف لكم ههههههههههه

وادخل الفرع قلت بالله كم باقي على الاشتراك قال باقي يومين انا قلت نفس اسعاركم قال الحين لا اشتراك السنة في نفس الباقات اللي انت مشترك فيها ب 1200

انا قلت ليش قال مدري هذه التعليمات جايتني انا مالي دخل قلت له ياخي انتم شايفين نفسكم على ايش يعني الحين ماعندكم غير الدوري السعودي والتشامبيونز ليغ

قلت له شف انا مشترك جزيرة وماشيه معي تمام ولا تقطع ورخيصة وتنقل دواري اكثر منكم لكن انا جاي اجدد والله عشان التشامبيونو

المهم قال تبي تشترك ولا لا قلت امري لله بكم الست شهور قال ب 660 قلت بالله جدد لي .

المهم جددت وانا نفسي بخشمي وجيت بروح للبيت والله قلت خلني امر على الركا  أشتري من شاورمار وادخل عليهم واعطيه 12 ريال وطلبت قال لا زودنا اسعارنا الحين ب 15 انا قلت ليه قال مدري انا مالي دخل قلت امري لله واعطيه 15 واطلب.

خلني اكلمك شوي عن منطقة الركا بالرياض اول شي منطقة فيها الشباب الصيع الخكر يعني حثالة المجتمع السعودي هناك في الركا على الساعة 12 بالليل

عرفتوا الخكر اللي يحطون مكياج وما مكياج والبنطلون طايح ووسيع كل الاشكال هذه هناك  يعني بالله هذولا وين رجولتهم وين العروبة اللي بهم كل هذا انقياد للغرب

المهم اللي خلاني اتكلم عن الموضوع اني دخلت اليوم لقيت كتابات كثيرة على الجدارن على غير العادة

بوريكم بعض الصور